BAGUIO CITY – Tarigagay ti Baguio Water District (BWD) a nayonan ti rates iti babayadan ti danum iti siudad ti Baguio.
Sigun kenni BWD General Manager Engr. Salvador Royeca, dumandanon ita iti P5-M ti binulan a mapukpukaw ti water district manipud napasaran ti epekto ti pandemya a nangitunda iti panakaiparikep dagiti ado nga establishimento iti lokalidad.
Dinakamatna nga iti baet ti nasao a tarigagayda ket saanda a maaramid gaputa ikonkonsiderada ti epekto ti agdama a pandemya.
Innayonna nga iti baet ti pukawda ket mangipapaayda latta ti diskwento nangruna iti business sector.
Agtaltalinaed a P370 tunggal 0-10 cubic meters ti rate iti residential areas bayat a P555 tunggal 0-10 cubic meters ti rate iti commercial areas.
Sigun pay kenkuana, adda met ti ar-aramiden ti BWD nga adjustment kadagiti panaggastosda tapno saan la unay a maapektaran dagitoy.
Inlawlawag pay ni Engr. Royeca a babaen iti panakaipangato met ti rates ti BWD ket makasubbotda manipud iti nagbalin a lugida ita a pandemya.
