Adu pay a tignay-protesta ti posible a maisayangkat kadagiti sumarsaruno nga aldaw iti siudad iti Baguio iti baet nga adun dagiti immuna a naisayangkat kadagiti naglabas nga al-aldaw.
Iti panakiuman iti Bombo Radyo kenni Mike Cabangon,dadaulo iti Kilusang Mayo Uno-Cordillera, kinunana a saanda pay napnek iti agdama gapu ta awan pay ti naibalud kadagiti pudno nga adda iti likudan iti korapsyon— banag a mangparparigat kadagiti umili a Pilipino.
Sigun kenni Cabangon, kasapulan a dagiti umili ti agtignay tapno makedngan iti pannusa dagiti karaman iti korapsyon.
Innayonna a dagiti umili ti addaan iti karbengan a manghusga kadagiti korap gapu ta patienna a maysa laeng a panagpammarang ti imbestigasyon a maisaysayangkat.
Patien ni Cabangon a dagiti nadutukan nga agimbestigar ket karaman metlaeng iti anomalya ken dagiti immunan a naarestar ket dagiti laeng maawagan a paspasurot dagiti pudno a nagbasol.
Innayon ti opisyal a kasapulan a mabaliwan ti sistema iti gobyerno nga inladawanna a bulok rason nga agtultuloy ti panakaisayangkat iti tignay-protesta.//Bombo Rob Dominguez
