BAGUIO CITY – Dumanon iti P15-M ti nailatang a pondo para iti maikadua a phase ti panakaimuntar dagiti kanayonan a CCTV cameras iti Central Business District, ditoy siudad ti Baguio.
Sigun kenni City Budget Officer Atty. Leticia Clemente, maaramat ti pondo iti panakagatang dagiti CCTV cameras ken iti panaka-ala dagiti kanayonan a personnel.
Dinakamatna a P12-M ti impaluspos ti lokal a gobyerno para iti umuna a phase ti proyekto a nakaimuntaran ti 66 a CCTV cameras, pakairamanan ti command center iti maikadua a kadsaaran ti Baguio City Police Office.
Innayon ni Clemente nga iti agdama ket manarimaan ti panakabukel ti Master Plan para iti listaan dagiti disso iti siudad a pakaimuntaran dagiti kanayonan a CCTV cameras, partikular dagiti hot spots wenno dagiti disso a kadawyan a pakapaspasamakan ti krimen wenno aksidente.
Manarimaan payen ti pananggatangda kadagiti kanayonan a CCTV cameras.
