Nakaprograman ti panakaaramid ti kanayunan a monitoring station iti Camp Site 2 iti Mt. Pulag National Park inton umay a tawen.
Iti panakiuman ti Bombo Radyo kenni Emerita Albas,Superintendent ti Mt. Pulag National Park, adda metlaeng ti naisingasing a panakaimuntar ti storm shelter iti Tawan Camp Site nu sadino, kiniddaw dagitoy ti maseknan a Local Government Unit ken dagiti tour guides para iti eksklusibo a camp site para kadagiti manggapo idiay Tawangan Trail.
Sigun kenni Albas, adda metlaeng ti mapangpanggep a panakaaramid ti monitoring station iti Mt. Al-al nga agserbi a checkpoint dagiti sumarungkar a dumalan idiay Tinoc, Ifugao.
Malaksid iti dayta, manamnama pay a manayunan inton umay metlaeng a tawen dagiti comfort rooms ken dagiti viewdecks iti nasao a pagpasyaran.
Iti sabali a bangir, adda ti naduktalan a digital maps nga ar-aramaten dagiti birders iti panagtalinaedda iti Camp Site 1 ken panagobserbarda kadagiti klase ti billet nga agnanaed sadiay.
Sigun kenni Albas, saan a ti panagturong iti summit ti ranrantaen wenno gandat dagiti birders nu di ket ti bird photography wenno bird watching iti nasao a site ti Mt. Pulag National Park.
Malaksid kadagiti birders, adda metlaeng dagiti agturtuong sadiay tapno obserbaran dagiti partikular a klase ti sabsabong.
Gapu iti dayta, kinuna ni Albas a masapol a madiverse ti niche dagitoy tapno madecongest dagiti daduma a paset ti nasao nga ecotourism park.//Bombo Rob Dominguez
