BAGUIO CITY – Nangabak iti kina-barangay kagawad ti maysa a kandidato ditoy siudada ti Baguio a nairaman iti “narco list” dagiti barangay iti pagilian nga immunan nga inruar ti Philippine Drug Enforcement Agency (PDEA).
Nakagun-od ni Jomarc Pabunan iti 178 a botos para iti kina-kagawad sadiay Barangay Lower Magsaysay.
Nupay kasta, gaputa adda ti kaduana a nakagun-od iti kapada a botos para iti umuna a pwesto iti kina-kagawad ket nagbunot dagitoy para iti panakabigbig no asino ti agbalin a first barangay kagawad.
Nabunot met ni Pabunan ti maikadua a pwesto kas barangay kagawad.
Iti panakiyuman ti Bombo Radyo, kinuna ni Pabunan a saanna a ninamnama a mangabak daytoy gaputa nairaman ti naganna iti narco list nga inruar ti PDEA idi April 30 sakbay a nangrugi ti campaign period.
Inaklonna nga idi nairaman ti naganna iti narco list ket pinanggepna nga isanod ti kandidaturana ngem napanunotna nga amangan no ipapan dagiti umili a guilty daytoy wenno pudpudno nga adda pakainaiganna iti iligal a droga.
Kinunana a ti nasao a kontrobersia ti nagserbi a karit kenkuana isut gapuna a sinaysayaatna ti nagkampania.
Dinakamat ni Pabunan a kabayatan ti panagkakampania ket adda dagiti umili nga arigna nanglalais kenkuana gapu iti pannakairamanna iti narco list.
Naklaat laengen daytoy gaputa maysa daytoy iti dua a kandidato sadiay Lower Magsaysay a nakagun-od iti kangatuan a botos iti kina-kagawad.
Naamuan a daytoyen ti maikatlo a termino ni Pabunan kas barangay kagawad iti nasao a lugar ken daytoy metlaeng ti kaudian a panagtugawna iti barangay dagitoy.
Kabayatanna, kinuna ti COMELEC a nababa ti voters turnout sadiay Lower Magsaysay gapu ta manipud iti nasurok 500 a rehistrado a botante ket dumanon laeng iti nasurok 300 dagiti nagbotos.
