BAGUIO CITY – Nagun-od ti maysa nga estudyante a nagturpos iti Philippine Science High School wenno Pisay Cordillera ti kangatuan nga average manipud kadagiti amin nga estudyante a nagturpos iti Philippine Science High School System iti sidong ti Department of Science and Technology (DOST) ita a tawen.
Sigun kenni DOST Secretary Fortunato Dela Peña, nakagun-od ti nasao nga estudyante iti 1.03 a general weighted average manipud iti grading system, no sadino, 1.0 ti kangatuan.
Dumanon met iti 87 dagiti estudyante ti Pisay-Cordillera a nagturpos ita a tawen.
Naamuan a karaman dagitoy kadagiti nasurok 1,300 nga estudyante a nagturpos ken agturpos iti Philippine Science High School System ti DOST ita a 2021.
Maibasar iti rekord ti Pisay-Cordillera ti maika-sangapulo ket maysa a campus ti 16 a campus ti Philippine Science High School System ti DOST ken masarakan daytoy sadiay Irisan, Baguio City.
