Tiniliw dagiti otoridad iti Ninoy Aquino International Airport (NAIA) ti top most wanted human trafficking suspect iti rehion Cordillera idi nakadanon daytoy manipod idiay Cambodia.
Binigbig iti Police Regional Office-Cordillera (PRO-CAR) ti suspek a ni John Lerry Amit, residente iti Los Baños, Laguna, a sumangsango iti kaso a qualified trafficking in persons, maysa a non-bailable offense iti sidong iti Anti-Trafficking in Persons Act.
Sigun iti imbestigasion, mapapati a nirekrut ni Amit ti maysa a residente iti La Trinidad, Benguet iti panagkarina iti sueldo a P70,000 tunggal bulan kas casino dealer idiay Cambodia.
Ngem idi nakadanon iti Phnom Penh idi Enero 2026, mapapati a kinumpiskarda ti pasaporte iti biktima ken pinilit nga agtrabaho iti maysa nga online scam hub sakbay a nakalibas ken nakaawid iti Pilipinas.
Gapu iti reklamo iti biktima, nangipila iti kaso dagiti otoridad ken nangiruar iti warrant of arrest ti Regional Trial Court idiay La Trinidad, Benguet idi Abril 21, 2026.
Nakemmeg ni Amit kalpasan a natunton dagiti otoridad ti panaggarawna idiay Cambodia ken natiliw iti panagsublina iti pagilian.
Ti qualified trafficking in persons ket adda iti kaskenan a nadagsen a pannusa, karaman ti tungpal biag a pannakaibalud nu napaneknekan a nagbasol iti korte.
