“With all the struggles no, I would say that there is so much joy in raising a child with autism”.
Dayta ti imbaga ni Ms. Karen Laking, maysa nga ina ken autism advocate.
Iti pannakiuman ti Bombo Radyo kenkuana, kinunana a nupay narigat ti nagdalanan daytoy kas maysa nga ina nga addaan iti anak nga addaan iti special needs ket inalana daytoy a tsansa tapno ad-adda pay a mapalawa ti pannakaammona iti autism.
Kinunana a narigat nga aklonen idi damu a naammuanna nga addaan iti autism ti maikadua nga anak daytoy iti tawenna a dua, ngem saan metlaeng a bimmayag ket naakseptarna metlaeng daytoy.
Gapu iti dayta, dagus a nagaramid dagitoy nga agasawa iti wagas tapno matulungan ti anakda nga addaan iti special needs.
Kinunana pay a dagiti sumagmamano a pagrigatanda kas maysa a nagannak ket ti pannakikomunikasyon iti anakda nangruna idi damu agsipud ta saanna a maibaga dagiti kayatna, financial a pangkasapulan, ken pagadalan nga appropriate iti kasasaad ti anakna.
Malaksid iti dayta, impettengna pay a maysa a pagbutbutnganna ket ti masakbayan agsipud ta saan nga agnanayon a napigsa daytoy a mang-aywan iti anakna.
Nupay kasta, naragsak latta daytoy iti anakna iti baet ti kasasaad daytoy.
Kabayatanna, nagpalagip met daytoy kadagiti padana a nagannak nga addaan iti annak nga addaan iti special needs nga ayatenda ken acceptarenda ti kasasaad ti annak dagitoy kasta metten a tulunganda dagitoy tapno matulungan dagiti annakda.
Kasta metten kadagiti addaan kabsat nga addaan iti autism, masapul met nga adda ti pannakaawat ken ayat iti kabsat a kakastoy.
Malaksid iti dayta, innayonna pay a nasaysayaat no adda dagiti special education unit subjects para kadagiti mannursuro tapno agbalinda nga aware tapno matulungan dagiti studyante-da nga addaan iti special needs.
