BAGUIO CITY – Sumangsangon iti kaskenan a kaso ti maatap lider ken maysa a miembro ti maysa a criminal group a konektado iti nagduduma nga iligal nga aktibidad sadiay Kalinga kas iti gun running ken land grabbing kalpasan a nakemmeg dagitoy sadiay Barangay Balong, Tabuk City, Kalinga idi napalabas a lawas.
Nabigbig ti lider ti Doctolero Criminal Group a ni Jerry Carag Doctolero, 44-anyos ken kapitan ti Barangay Balong, Tabuk City bayat a nabigbig ti miembro daytoy a ni Jocel Carag Doctolero, 33-anyos, mannalon ken residente metlaeng ti nasao a lugar.
Nakumpiskar manipud iti kapitan ti innem a magazine ti M16 rifle, maysa a magazine ti caliber 9mm pistol, tallo a magazine ti AK 47 rifle, 32 a bala ti M16, maysa a bala ti caliber 45 pistol, maysa a bala ti shotgun, dua a magazine ti caliber 30, maysa a plastic case ti caliber 30 rifle ken maysa a plastic case ti Taurus pistol.
Nakumpiskar met kenni Jocel Doctolero ti maysa nga AK 47 rifle, maysa a magazine ti AK 47 rifle ken dua a bala ti AK 47 rifle.
Nakemmeg daytoy babaen iti naiserbi a search warrant nga impaulog ni Regional Trial Court, Branch 25, Bulanao, Tabuk City, Kalinga Presiding Judge Jerson Angog.
Kinuna ni PBGeneral R’Win Pagkalinawan, Regional Director ti Cordillera Police a ti Doctolero Criminal Group ti responsable iti serye ti gun running, gun trading ken land grabbing sadiay Kalinga ken kadagiti kabangibang daytoy a probinsia.
Umap-apela pay ti Cordillera Police iti publiko nangruna kadagiti nagbalin a biktima ti grupo tapnu apanda agreport iti kaasitgan nga istasyon ti pulisya para iti panakaipila ti kaso kontra kadagiti suspek.
