BAGUIO CITY – An-anupen paylaeng dagiti otoridad ti agama a suspek iti panakapapatay ti maysa a lalaki sadiay Lingtan, Bangued, Abra idi kalman.
Nabigbig dagiti suspek a da Lingtan Punong Barangay Claudio Bobias, 56-anyos ken anakna a ni Gideon Ray Bobias.
Nabigbig met ti biktima a ni Robin Bergonia, 24-anyos a naideklara a dead on arrival iti pagagasan.
Maibasar iti imbestigasyon, napan gimmatang ti biktima iti pagtagilakuan iti abay ti balayda ngem sadiay a pinalpaltogan daytoy ti agama a suspek.
Natamaan ti nagduduma a paset ti bagi ti biktima a nagresulta iti ipupusayna bayat a nasarakan met dagiti pulis dagiti basyo ti bala ti caliber 45 iti crime scene.
Iti interview ti Bombo Radyo Baguio kenni PCol. Alfredo Dangani, dadaulo ti Abra Police Provincial Office, kinunana a panagbales ti motibo ti krimen.
Sigun kenkuana, idi naki-quarantine checkpoint ti kapitan idi napalabas a lawas ket pinalpaltogan daytoy ti dua a suspek nga agingga ita ket maan-anop.
Dinakamatna a ti biktima a ni Bergonia ket first cousin ti maysa kadagiti suspek a nangpalpaltog kenni Bobias.
Innayon ni Dangani a manarimaan ti negosasyonda iti pamilya ti agama para iti panagsuko dagitoy iti baet nga addan ti nakasagana a kaso kontra kadagitoy.
