BAGUIO CITY – Agtultuloy ti nainget nga imbestigasyon dagiti otoridad para iti panakabigbig dagiti suspek ken nu anya ti motiboda iti panangpapatayda iti kapitan ti Brgy. Budac, Tayum, Abra itay parbangon.
Nabigbig ti biktima a ni Daycarlo Paligutan Millare, 39, addaan iti asawa ken residente iti nasao a lugar.
Maibasar iti inisyal nga imbestigasyon ti Bangued PNP, naglugan ti biktima ken ti dua iti motorsiklo ken agideliberda kuma iti tabako sadiay Candon City.
Nupay kasta, bayat nga addada sadiay Brgy. Patucannay, Bangued, Abra ket pinalpaltogan dagitoy ti riding in tandem suspects a nakalugan iti black XRM motorcycle.
Dagus a pimmusay iti insidente ti nasao a kapitan bayat a saan met a naan-ano dagiti dua a kadwana.
Iti panangiproseso ti SOCO iti crime scene ket narekoberda ti pito a buli ken maysa a basyo ti mapapati a caliber .45 a paltog.
