BAGUIO CITY – Panggep ni agdama a Dominican Mirador Punong Barangay Carol Domogan a mangipila ti election protest iti Municipal Trial Court para iti panakaipatungpal ti recount iti resulta iti naangay a panagbobotos iti barangay dagitoy.
Naamuan a maysa laeng a puntos ti nagbaetan ti dua kalpasan a nakaawat ni Domogan iti 476 a botos bayat a ni Kagawad Remedios Laygo ket nakaawat ti 477 a botos.
Nupay kasta, kangrunaan nga iyap-apela ni PB Domogan ket dagiti maatap nga iregularidad iti naipatungpal nga eleksyon babaen kadagiti nagserbi a Board of Election Inspectors (BEIs).
Kinunana a naamuanda a maysa a ballot box iti maysa a presinto ti dagus a linukatan dagiti BEIs idinto a saan pay a nangrugi ti opisyal a panagbibilang kadagiti botos.
Innayonna a mismo a dagiti BEIs ti nangsurat iti sumagmamano a balota tapnu maipaay ti puntos iti kalabanna a kandidato.
Kabayatanna, nakasagana met ni Kagawad Remedios Laygo a mangsungbat iti amin nga alegasyon ni PB Domogan seknan iti maatap nga iregularidad iti resulta ken iti proseso ti naangay a panagbobotos iti barangay dagitoy.
Impetteng ti napili a kapitan ti Dominican-Mirador Barangay a nagbalin a patas ti kampona ken awan ti dakes nga inaramidda kabayatan ti eleksion.
Kinunana a kabayatan iti panagbibilang iti botos ket kompleto dagiti watchers ti amin a kandidato.
Iti baet daytoy, nakasagana latta ni Laygo a sumango iti korte tapnu malawlawagan dagiti alegasion nga ibatbato ti kampo ti agdama a kapitan dagitoy.
