BAGUIO CITY–Guyguyuguyen ti lokal a konseho ti siudad dagiti amin nga establishimiento para iti panangipaayda iti diskwento kadigiti persons with disabilities (PWD’s) nga addaan PWD identification card.
Maibasar iti report, makaaw-awat ti Persons with Disabilities Affairs Office (PDAO) ti ado a reklamo manipud kadagiti PWDs gaputta saan dagitoy nga agnumnumar iti 20% discount tunggal gumatang dagitoy kadagiti kangrunaan a gagatangen ken 12% discount no agbayadda iti buwis.
Maipalagip a nakalanad iti RA No. 9442 wenno iti Magna Carta for Disabled Persons a karbengan dagiti PWDs a maipaayan iti 20% discount kadagiti drug stores, medical ken dental services pakairamanan dagiti diagnostic, laboratoy fees ken professional fees manipud kadagiti doctors.
Malaksid iti dayta, maipayaan metlaeng dagitoy iti discounts kadagiti business establishments kas iti hotels ken restaurants, admission fees kadagiti sinehan ken pamasahe kadagiti domestic land, air ken sea travel.
Maibasar met iti RA No. 10754, maipaayan ti pannusa dagiti establisyimento a saan a mangipapaay ti pribilehiyo, benepisyo ken insentibo kadagiti PWDs nga agdawat ti serbisyo dagitoy.
Pinalagipan met ti konseho dagiti personalidad ti PDAO ken daduma pay a maseknan nga ahensiya ti gobyerno iti panangipatungpalda iti nadakamatna a linteg ken ipaayda ti kaskenan a pannusa kadagiti agtagikua ti establisyimento a saan nga agtungpal iti daytoy
Kagiddan iti dayta, guyguyoguyen ti konseho dagiti PWDs nga awanan identification cards nga agaplikar dagitoy tapno mairamanda kadagiti benipisyo a nailatang para kadakuada.
