BAGUIO CITY – Pimmusay ti maysa a karpintero kalpasan a napalpaltugan daytoy sadiay Tayum, Abra idi rabii.
Nabigbig daytoy a ni Perfecto Padagas Timbreza, 47-anyos, residente ti Wayya, Velasco, Tayum, Abra.
Maibasar iti report ti Tayum Municipal Police Station, napasamak ti insidente iti mismo nga arubayan ti balay ti biktima pasado alas syete idi rabii.
Sigun iti pulisya, rimuar ti biktima idi balayda tapno apanna alaen ti cellphone-na iti furniture shop daytoy iti likodan ti balayda.
Ditoy metten a pinalpaltogan ti saan pay a nabigbig a suspek ti biktima.
Naglak-am ti biktima iti tama ti paltog iti nagduduma a paset ti bagina.
Naitaray pay daytoy iti ospital ngem naideklaran a pimmusay.
Maipatpatungapl ti nainget nga imbestigasion para iti pakabigbigan ken motibo ti suspek iti nasao a pammaltog.
