Awan ti nadangran nga indibidual iti missile attack nga insayangkat ti Iran iti base militar ti Estados Unidos idiay Qatar.
Iti pannakiuman ti Bombo Radyo kenni Mildred Ngoaban Lloren, Bombo International News Correspondent sadiay Qatar, kinunana a natalged amin nga indibidual agraman dagiti Pilipino a mangmangged, iti baet nga adda ti natnag a missile iti nasao a lugar.
Sigun kenkuana, nagsublin iti normal a kasasaad idi laeng kalman.
Kinunana a dakkel a tulong dagiti security forces gaputa inyunay-unayda ti seguridad dagiti umuli.
Aklonenna nga iti uneg ti duapulo a tawen a panagnaedna iti nasao a pagilian, daytoy ti umuna a gundaway a napasaranna ti nasao a banag.
Kabayatanna, kiddawna iti publiko a liklikanda dagiti damag a saan a pudno maipapan iti kasasaad idiay Qatar.
Daytoy ket kalpasan nga adda dagiti agwarwaras kadagiti group chat dagitoy a saan a pudno ken lihetimo.
Insingasingna a dagiti laeng naberipikar nga impormasion wenno kadagiti reliable sources a kitaen dagiti pudno a damag tapno saan nga maiyaw-awan ti publiko ken saan nga agdanag dagiti dadduma a pamilia dagiti mangmangged iti ballasiw-taaw.
