BAGUIO CITY – Mangipila ti Baguio City Police Office (BCPO) iti kaso a kriminal kontra iti taxi driver a nangdarundun iti pulis a traffic enforcer sadiay Abanao Street, siudad ti Baguio itay nabiit.
Iti interbyu ti Bombo Radyo Baguio ken ni PCol. Allen Rae Co, director ti BCPO, kinunana nga apaman a mapagtitipon dagiti statements dagiti testigo ket maipilan ti kaskenan a kaso kontra iti driver a ni Jone Buclay.
Inlawlawagna a nasken a masurot ti reglementary period of detention iti sidong ti Article 125 ti Revised Penal Code gaputa saan daytoy a naipatungpal idi nakemmeg ni Buclay gapu iti panangipanaw kenkuana ni Judge Roberto Mabalot.
Kinunana pay a nakikoordinaren ni Mayor Benjamin Magalong kenni Supreme Court Administrator Jose Midas Marquez para iti posible a panakaipila ti kaso kontra kenni Judge Mabalot.
Kabayatanna, tinakderan ti BCPO ti immunan nga statement ti pulisya kontra ken ni Judge Mabalot.
Impetteng ni Col. Co a sigun kadagiti kameng ti BCPO – Station 7 ket nangato ti boses ti nasao a huwes idi nagturong daytoy iti istasyon ti pulisya.
Kinunana a gapu iti nangato a boses ti huwes naklaat dagiti pulis a nakaimatang iti pasamak karkaro iti biktima a ni Patrolman Julius Walang.
Impeksana ti personal nga opinion-na ken kinunana a mamati daytoy nga arigna nagserbi ni Mabalot nga abogado ti nakemmeg a taxi driver a ni Buclay gapu iti panangbalakad ti huwes a saan a mangipaay ti driver iti aniaman nga statement.
Inlawlawag pay ni Col. Co a daytoy ket gaputa inkalintegan ti huwes ti taxi driver ken imbaga ti huwes a saan a mabalud ni Buclay gaputa traffic violations laeng ti naaramidan daytoy uray nakita a mismo ti judge a positibo a nakainom iti arak ti taxi driver.
Maipalagip a pinaglibakan ti huwes ti statement ti BCPO a nangato ti bosesna ken ti maatap a panangabogadona iti nakemmeg a taxi driver.
