Nangipila iti kaso a perjury ti kampo ni Police Senior Master Sgt. John Mollenido — ti asawa ti napapatay a pulis a ni Diane Mollenido kontra iti agtagikua iti funeral parlor ken kadagiti empleyado daytoy.
Sigun iti abogado ni John Mollenido a ni Atty. Cristomal Rimando,dagiti naakusaran ket nangipaay kadagiti nasapataan a perjurious statements kontra iti kliyentena a nangitunda iti panakaipasidong daytoy iti Restricted Custody.
Malaksid iti dayta,kinuna ti abogado a nakaitunda pay dagitoy iti unwarranted public humiliation kenni John.
Maipalagip a kalpasan a nasarakan ti awananen iti biag a bagi daydi Police Senior Master Sgt. Diane Marie Mollenido iti maysa a creek idi January 24 ken ti napapatay metlaeng nga anakna a ni John Ysmael idiay Tarlac idi January 29 ket naipasidong iti restrictive custody ni John bayat a maipatpatungpal ti imbestigasyon.
Dagiti maitudtudo a suspek iti panakapapatay dagitoy ket dagiti agasawa a Pia ken Christian Panganiban a mainaig metlaeng iti maatap a kaso ti scam iti vehicle sale transaction.
Kabayatanna,kinumpirmar met iti Quezon City Police District (QCPD) a naglususlos ti legal counsel dagiti suspek rason a naitantan ti preliminary investigation a naituding idi February 11.
