Inrekomendar ti Independent Commission for Infrastructure (ICI) ken ti Department of Public Works and Highways (DPWH) iti Office of the Ombudsman ti pannakaimbestigarda sigud nga Ako Bicol Rep. Zaldy Co ken dagiti pito a miembro ti kamara para iti possible a kaso a plunder ken bribery gapu iti mapapati a pakainaiganda iti binibillion a gatad ti infrastructure projects manipud idi 2016 agingga 2024.
Sigun kenni ICI chairperson Andres Reyes Jr. dagitoy ket dagiti sumagmamano a congressmen ken congresswoman no sadino inawaganna dagitoy kas “cong-tractors”.
Kinunana a naduktalan a naglabsing dagitoy iti Code of Conduct para iti Government Officials ken Anti-Graft and Corrupt Practices Act.
Inlawlawagna pay a naawagan dagitoy a cong-tractors agsipud ta dagitoy ket partner wenno miembro ti agtagikua iti construction firms a nakaawat iti project awards manipud iti Department of Public Works and Highways.
