Naituding a maiyakar ti kaso a graft ni dismissed Bamban, Tarlac Mayor Alice Guo manipod iti Regional Trial Court idiay Capas, Tarlac paturong iti Valenzuela Regional Trial Court.
Immunan nga imbilin ti Capas Regional Trial Court Branch 109 ti pannakakemmeg ni Guo mainaig iti naipila a kaso a graft kontra kenkuana.
Nupay kasta, inrason ni Senate Majority Leader Francis Tolentino rumbeng a saan koma a naipila ti kaso a graft iti Capas RTC no di ket iti ruar ti judicial region a nagtakeman ti naikkat a mayor.
Kabayatanna, kadua ni dismissed mayor Alice Guo dagiti 35 a dadduma pay nga indibidual ti sumangsango iti 85 counts a money laundering nga impila ti Anti-Money Laundering Council (AMLC) nga aggatad ti agarup P7 billion mainaig iti naserrek a POGO hub idiay Bamban ken Porac, Pampanga.
Naipila metten ti quo warranto petition kontra kenni Guo a mabigbigbig metlaeng iti nagan a Guo Hua Ping, iti korte idiay Manila, kasta metten ti pannakakanselar ti “birth certificate” daytoy iti korte idiay Tarlac.
Ngem amin nga alegasion kontra kenkuana ket pinaglibakanna.
Maipalagip a ni Guo a sumangsango iti nagtutuon a kaso kas iti human trafficking, “undesirability” ken “misrepresentation” iti sidong ti linteg ti Philippine immigration, ket naisubli iti Pilipinas idi Agosto 6 babaen ti pribado nga eroplano.
Nakemmeg ni Guo idiay Indonesia, ken mapapati nga iligal a naglibas iti Pilipinas idi Hulio iti baet ti sangsanguenna a kontrobersia seknan iti “citizenship” daytoy ken ti maatap a pakainaiganna iti naserrek a Philippine Offshore Gaming Operator (POGO) hub iti masakupanna a munisipio idiay Tarlac.
