BAGUIO CITY – Sumaysayaat ti datus iti bilang dagiti kaso ti COVID-19 iti siudad ti Baguio iti napalabas a lawas kas maibasar iti rekord ti City Health Services Office.
Sigun kenni City Health Officer Dr. Rowena Galpo, nupay agtaltalinaed a moderate risk ti epidemic risk level ti siudad ket simmayaat met ti dua nga indicators daytoy, partikular ti average daily attack rate (ADAR) ken ti two-week growth rate (TWGR).
Ti ADAR ket ti panagbingay ti popolasyon a makapkaptan ti COVID-19 iti partikular a panawen ken ti TWGR ket ti kapartak ti panagbaliw ti bilang dagiti kaso iti tunggal dua a lawas.
Kinuna ni Dr. Galpo a ti ADAR ti Baguio idi May 3-10 ket bimmaba iti 14.5 percent manipud iti 15 percent bayat a ti TWGR ket bimmaba iti -40 percent.
Maibasar iti rekord idi May 10, pakabuklan a 11,253 ti kaso ti siudad iti COVID-19, pakairamanan ti 932 nga aktibo a kaso.
Nailista met ti 89.67 kas case recovery rate ti siudad nupay nagtalinaed a nangato ti fatality rate a pakailislistaan ti dua agingga tallo nga ipupusay iti innaldaw.
Nupay kasta, linawlawagan ni Dr. Galpo a manipud iti 162 a pimmusay ditoy siudad nga addaan pakainaigan iti COVID-19 ket 118 ti nakumpirmar a residente ti Baguio bayat a maberberipikar paylaeng ti address dagiti nabatbati a 42.
Simmayaat pay ti hospital care utilization rate ti Baguio iti 72.43 percent wenno high risk level manipud iti sigud a critical risk level bayat a ti isolation utilization ket adda iti low risk level.
