BAGUIO CITY – Impaganetget manen ti Cordillera Regional Anti-Cybercrime Unit ti naan-anay a panagridam ti publiko kontra kadagiti nagduduma a kita ti cybercrimes kas iti online scam.
Iti interview ti Bombo Radyo Baguio, dinakamat ni PLTCOL. Divina Mencio, Regional Assistant Chief ti nasao nga opisina nga adon dagiti naireklamo ken nagreklamo ditoy rehiyon gapu iti online scam idi napalabas a tawen.
Sigun kenkuana, kangrunaan a nailistada ti online selling ken online investment kas modus dagitoy.
Kinunana a karaman a naireklamo ken agirekreklamo dagiti bogus ken biktima nga buyers, sellers ken scammers pakairaman pay dagiti delivery riders.
Sumagmamano metten kadagitoy ti napilaan iti kaso bayat nga awan pay ti naibalod kadagiti mapilpilaan iti aniaman a kita ti cybercrime.
Gapu iti daytoy, inyunay-unayna ti naan-anay a panagsukimat ti publiko kadagiti maka-transaksionda iti online tapnu saanda nga agbalin a biktima.
