BAGUIO CITY – Ngimmato iti 114 percent dagiti kaso ti dengue iti rehion Cordillera manipud Enero 1 agingga Hunyo 9 ti agdama a tawen.
Nakailista ti Regional Epidimiology and Surveillance Unit ti DOH-Cordillera iti 1, 324 a kaso ti dengue iti nasao a bulan, nangatngato no idilig iti 620 a kaso kadagiti kapada a bulan idi napalabas a tawen.
Kinuna pay ti ahensia a tallo ti nailista a pimmusay iti rehion gapu iti dengue.
Nailista met ti Kalinga ti kangatuan a kaso ti dengue a dimmanon iti 322 a sinaruno ti Benguet a dimmanon iti 306 ken ti Apayao a dimmanon iti 164.
Gapu iti daytoy, ibalbalakad manen ti ahensia ti panagannad ti publiko kontra iti dengue ken ti panangituloyda a mangaramid kadagiti addang tapnu madadael dagiti disso a mabalin a pagpapaaduan dagiti lamok a nakaimet iti dengue virus.
