Imonmonitor ita dagiti kameng ti Benguet Provincial Health Office dagiti sumagmamano a munisipalidad iti probinsya ti Benguet kagiddan ti ngumatmgato a bilang dagiti kaso ti sakit a dengue.
Iti panakiuman ti Bombo Radyo kenni Dr. Cham Bacuso, Medical Specialist 1 ken Public Health Programs Head ti Provincial Health Office-Benguet,nangatngato ti bilang dagiti nailistada a kaso ti dengue manipod January 1 agingga April 27 ita a tawen nu idilig iti nailistada a kaso iti kapada metlaeng a reporting period idi napan a tawen.
Sigun kenni Dr. Cham, dandanin maipasidong iti alert level ti munisipalidad ti Kabayan gapu iti naobserbaran a napartak a panagngato ti kaso ti dengue sadiay nu sadino, nakailista dagitoy ti sangapulo ket pito(17)a kaso iti las-od laeng ti pito nga aldaw, partikular iti baet ti April 21 agingga April 27.
Maibasar iti rekord ti nasao nga opisina, maikadua ti Kabayan kadagiti addaan ti kadaklan a porciento ti ngimmatwan ti kaso ti dengue nu sadino dumanun daytoy iti 124% a bukbuklen ti 73 a kaso manipod iti sigud a bilang daytoy a 33; bayat a ti munisipalidad ti Mankayan ti nakailista ti kadaklan a porciento ti ngimmatwan iti nasao a sakit nu sadino, dumanun daytoy iti 132% a bukbuklen ti 44 a kaso manipod iti 19 a bilang laeng daytoy idi 2023.
Nupay amin nga indibidwal ket posible a makagat ti lamok nga addaan ti dengue virus, kadawyan a maap-apektaran iti daytoy dagiti ubbing nga agtawen ti sangapulo agingga katorse.
Gapu iti dayta, inyunay-unay ti nasao a doktor ti dagus a panagpakonsulta apaman a makarikna ti saan a nasayaat iti pammagi.
Kagiddan dayta, impaganetgetna ti konsepto ti 4S wenno ti Search and Destroy; Secure Self Protection;Seek Early Consultation; ken ti Say Yes to Fogging a makatulong tapno maliklikan ti ad-adda a panagraira ti dengue.
Kabayatanna, awan pay ti nailista a kaso ti ipupusay gapu iti nadakamat a sakit iti nasao a reporting period iti agdama a a tawen.//Bombo Rob Dominguez
