Nainget ti monitoring ti Department of Health (DOH), kasaruno ti panagadu dagiti kaso ti hand, foot and mouth disease (HFMD) iti pagilian.
Maibasar iti datos idi Agosto 16, ngimmato iti 39,893 ti kaso ti nasao a sakit.
Nanayunan daytoy iti nasurok, 2,000 iti las-ud ti maysa a lawas manipud iti bilang a nailista idi Agosto 9.
Sigun iti Department of Health, 50% kadagiti nakaptan iti nasao a sakit ket pakairamanan dagiti ubbing nga agtawen iti maysa agingga iti tallo.
Gapu iti dayta, makikoordinar ti DOH kadagiti lokal a gobierno tapno mapapigsa ti panangbantay kadagiti addaan iti HFMD a rehion.
Malaksid iti daytoy, mangisayangkat ti ahensia ti taripnog iti health learning institution ti DOH maipapan kadagiti addang a maaramid tapno malapdan ti sakit kadagiti pagadalan.
Sigun iti DOH, makaakar a sakit ti HFMD ken mabalin a maakaran babaen iti laway a naglaon iti virus manipud iti panagbakwar, panaganges, wenno panagsao.
Gapu iti dayta, agbalbalakad manen ti DOH nga iti kanito a makarikna kadagiti sintomas a kas iti gurigor, singaw iti ngiwat, sakit ti karabukob, rashes ken dadduma pay, dagus nga agpakonsultaka iti kaasitgan a health center.
