Ngimmato iti 156% ti kaso ti influenza-like illness (ILI) ken severe acute respiratory infections iti rehiyon Cordillera idi napalabas a tawen.
Ti nasao a datos ket nangatgato no idilig idi tawen dos mil biente tres.
Sigun kenni Victoria Malicdan, Nurse V iti Department of Health Center for Health Development Cordillera, maysa ti pimmusay iti probinsya ti Abra ken dua iti probinsia ti Benguet idi napalabas a tawen gapu iti influenza like illness ken severe respiratory acute infections.
Malaksid iti dayta, nailista a 22,144 a kaso ti influenza-like illness (ILI) ken severe acute respiratory infections iti rehiyon Cordillera idi napalabas a tawen.
Nangatngato nu idilig idi dos mil biente tres nu sadino adda ti nailista nga 8, 639.
Sigun kenni Malicdan, kadawyan a naapektaran iti nasao a sakit ket dagiti lallaki a dumanon iti 11,237 wenno 51%.
Malaksid iti dayta, kadawyan kadagiti naapektaran ket dagiti agtawen iti nababa iti siam a dumanon iti 14, 360 wenno 65%.
