BAGUIO CITY -In-inot a bimmaba dagiti kaso ti malnutrisyon kadagiti ‘under five’ nga ubbing iti rehion Cordillera.
Nagbalin nga obserbasyon daytoy ti National Nutrition Council (NNC)-Cordillera kas maibasar iti panagadalda kadagiti uppat a kangrunaan a pagrukudan ti malnustrisyon.
Sigun kenni Bella Basalong, OIC-Regional Nutrition Program Coordinator ti NNC-CAR, manipod 2018 agingga 2021 ket bin-ig a bimmaba ti kaso ti malnutrisyon kadagiti ubbing nga agtawen ti lima nga agpababa iti rehion.
Nupay kasta, dinakamatna nga agtaltalinaed latta a pakaseknan ti malnutrisyon nga agkasapulan ti naan-anay nga atensiyon dagiti lokal a gobyerno.
Innayonna a manipud kadagiti kangrunaan a pagrukudan ti malnutrisyon ket ti stunting wenno panakatiltil ti kaaduan iti rehion, partikular iti nasusulinek a lugar.
Inlawlawagna a maap-apektaran ti panagdakkel dagiti ubbing no saan a napintas ti sistema iti panakapakan dagitoy, limitado ti maipapaunegda a sustansia ken nutrisyon, saanda a matutukan iti serbisyo para iti salun-at, kinakurapay ken saan a nasayaat a sasaaden ti pagtaengan.
Maibasar iti datus ti NNC, iti Cordillera ket ti Abra ti nakailistaan ti kangatuan a kaso ti malnutrisyon, partikular ti panakatiltil.
Naamuan pay a 4.5% kadagiti ubbing iti rehion ti kurang ti timbangda no idilig iti tawenda ken 33.4% dagiti natiltil nga ubbing bayat nga iti survey ket maikalima ti Cordillera kadagiti rehion iti pagilian a nakailista ti kaaduan nga ubbing nga overweight a nangatngato pay no idilig iti datus ti national level.
