BAGUIO CITY – Ngimmato ti bilang ti “teenage pregnancy” iti probinsiya ti Benguet kas maibasar iti kaudian a datus ti Philippine Statistics Authority idi tawen 2022.
Iti exclusive interview ti Bombo Radyo kenni Cecile Basawil, Regional Director ti Commission on Population and Development – Cordillera, nakailista ti Benguet ti 454 a bilang; simmaruno ti Baguio City a 394; Kalinga a 361; Ifugao a 329; Abra a 328; Mt. Province a 260; ken Apayao a 259.
Sigun kenni Basawil, narigat ti agbalin a “Batang Ina” ken “Batang Ama” gapu ta adu dagiti gundaway a saanda a magun-od ken maragpat kas iti makaadal ken nasapa unay a marikna da ti responsibilidad kas nagannak iti baet ti kinaubing dagitoy.
Agbalbalin met a rason ti kinakurapay ken ti poor education para iti nasapa a panagsikog dagiti agtutubo.
Gapu iti dayta, impeksa ni Basawil a kasapulan ti panangipaay iti naan-anay nga impormasyon kadagiti agtutubo seknan iti nasapa a panagsikog.
Malaksid iti dayta, kinuna ti opisyal a dakkel ti akem dagiti amin nga ahensiya kasta met dagiti nagannak dagitoy para iti panakagun-od ti zero case ti teenage pregnancy iti rehiyon Cordillera.
Innayona a rumbeng a mangipaay ti impormasyon ti Department of Education maipapan iti reproductive health babaen iti panakaisuro daytoy kadagiti pagadalan nangruna ta agbalbalin a karit no kasano daytoy a mapagtalantanan iti maysa a pamilya.
Para met kadagiti Local Government Units, adda dagiti teen centers a mabalin a pagturongan dagiti teenager no adda ti problema da tapno saanda nga agaramid iti sabali pay a bambanag.
Impaganetget met ni Basawil nga iti panangliklik iti teenage pregnancy ket rumbeng ti pagbalin da a role model agsipud ta dagitoy ti umuna a source of information dagiti agtutubo.
Nasken met a kitaen ken ikonsidera dagiti nagannak ti panakisarita da kadagiti annakda para iti healthy environment tapno saan dagitoy a kanayon nga agdependar iti internet.//Bombo Mera Pacpacan
