BAGUIO CITY– Nasken nga adda ti memorandum of agreement wenno katulagan iti nagbaetan ti lokal a gobyerno ti Bakun, Benguet ken ti HEDCOR Incorporated sakbay a maituloy ti operasyon ti planta ti korporasyon a masarakan iti nasao a lugar.
Impeksa daytoy ni Bakun Mayor Bill Raymundo kalpasan a nagpaso idi pay 2016 ti immunan a katulagan dagitoy a napirmaan idi 1991.
Sigun kenkuana, nasken a maipaay ti 3% a bingay ti lokal a gobierno ti Bakun, Benguet manipud iti pakabuklan a mapastrekan ti kompanya sakbay a maipaayan dagitoy iti business permit gaputa daytoy ti nakalanad iti immuna a katulaganda.
Impaganetgetna pay a sinuratanda ti HEDCOR kadagiti naglabas a tawen ngem agingga ita ket awan pay ti sungbat ti korporasyon.
Kabayatanna, inkalintegan ti HEDCOR a boluntaryo ti panangipaayda iti bingay ti lokal a gobyerno nupay nasken nga agbayadda latta iti buis kas nailanad iti katulagan.
Nangitunda daytoy iti saan a nagkinanawatan ti kompanya ken ti lokal a gobierno ti Bakun ken ti temporaryo a panakaipasardeng ti operasyon ti dua a planta ti HEDCOR.
Impeksa pay ni Raymundo nga awan ti panggepda a permanente a maiparikep ti planta la ketdi sungbatan ti kompanya ti surat ken agturongda iti munisipyo tapno makipatang kadakuada.
