Nagpinnirma ti Department of Education(DepEd) ken Local Government Units(LGUs) iti baro a katulagan wenno memorandum of agreement (MOA) para iti naparpartak a panakapasayaat dagiti silid-pagadalan.
Daytoy ket maitunos iti pammilin ni President Ferdinand Marcos Jr. nga ifast-track ti panakaipaay dagiti kangrunaan a pasilidad para iti edukasyon.
Ti nasao a tignay ket makatulong tapno malag-anan dagiti mannursuro ken dagiti estudyante manipod iti mapaspasran ita a congestion kadagiti silid-pagadalan.
Sigun kenni Education Secretary Sonny Angara, babaen iti nasao a katulagan ket mapapartak ti koordinasyon iti DepEd ken dagiti lokal a gobyerno a bigbigen dagiti pagadalan a kasapulan a maipangruna tapno mapapartak met ti panakaiyimplimintar dagiti classroom projects.
Ti nasao a katulagan ket maitunos metlaeng iti probisyon iti 2026 General Appropriations Act nu sadino, nakalanad a kasapulan ti nasao nga ahensya a makitinnulong kadagiti lokal a gobyerno para kadagiti basic education facilities.
Mainaig iti dayta, dinakamat ni Angara a makikokoordinar da metten kadagiti kangrunaan nga asosasyon dagiti LGU kas iti League of Provinces of the Philippines (LPP), Union of Local Authorities of the Philippines (ULAP), ken League of Cities of the Philippines (LCP) para iti panakaipinal dagiti detalye iti implimentasyon dagiti proyekto.
