![](https://img.bomboradyo.com/baguio/2021/04/baguio-tree.jpg)
BAGUIO CITY – Maiyusuat inton May 24 ti kaunaan a Baguio Tree Festival.
Sigun kenni Atty. Renan Diwas, dadaulo ti City Environment and Parks Management Office (CEPMO), ti pestibidad ket naibasar iti Baguio Environment Code a mangimanmandato iti panangisayangkat ti siudad ti Baguio iti aktibidad tunggal Hunyo agingga Setyembre wenno iti planting season.
Kinunana a mangnamnamada a pormal a mapagbalin nga aktibidad ti siudad ti nasao a pestibidad kas kiddaw dagiti nagduduma a sektor, ahensia ken non-government organizations a mangtartarigagay a mangisayangkat ti panagmula kadagiti kaykayo.
Panggep ti CEPMO nga idauluan dagiti panagmula ti kayo iti siudad babaen iti nagduduma a grupo tapnu maadal ti panagballigi ti nasao nga akibidad ken agserbi a basaran iti kaparda nga aktibidad kadagiti masungad a tawtawen.
Sakupen ti pestibidad dagiti aktibidad kas iti selebrasyon ti World Environment Day, panakaisayangkat ti Mobile Tree Cart Parade Day ken Mobile Tree Cart Exhibit and Display, community tree planting iti nagduduma a disso ditoy siudad kagiddan ti Arbor Day, panangipaay iti Green Thumb Award ken dadduma pay.
Innayon ni Atty. Diwas a puntirya ti Tree Festival a maisuro ken maallukoy dagiti umili ti siudad ken ti komunidad a makipaset iti urban forest management program ti Baguio.