Naipatungpal ti kaunaan a Gong Festival idiay Dixon Place, USA ita a bulan ti Oktobre.
Ti nasao a selebrasyon ket inorganisar ti Cordillera Cultural Ensemble (CCE), maysa nga organisasyon idiay New York, USA a bukbuklen dagiti Cordillerans nga agnanaed ken mangmangged iti nasao a lugar.
Panggep ti nasao nga aktibidad a pagtitiponen amin a Cordillerans kasta metten dagiti nagduduma nga Igorot organizations idiay Estados Unidos tapno maparegta ti komunidad dagiti taga-Cordillera iti nasao a pagilian.
Malaksid iti dayta, panggep daytoy nga ipakita ken ipresenta kadagiti komunidad ti Estados Unidos dagiti kultura ti Cordillera babaen iti panangipresentada kadagiti tradisyonal a kanta ken sala.
Tampok metlaeng iti nasao a pestibidad ti gong workshop no sadino naipresenta ken naisuro no kasano nga ay-ayamen ken patugtogen dagiti gangsa iti nagduduma a probinsya iti Benguet.
Nagserbi met kas guest iti nasao nga aktibidad ni Miss Global Philippines 2026 Valerie Pawid West manipud Ifugao kasta metten a pinasetan daytoy ni Bona Stella Mateo Rivera, Miss Little Miss Northern Luzon 2023, a mannarimaan nga agnanaed sadiay New York.
