Kinumpirmar dagiti health authorities sadiay Spain ti panakaiyakar ti dengue virus iti maysa a lalaki sadiay Madrid.
Sigun kenni Susana Jimenez manipud iti Public Health Department ti Madrid, naakaran iti dengue ti maysa a 41-anyos a lalaki kalpasan a nakinaig iti lalaki a partner daytoy.
Naamuan a ti nangiyakar iti dengue ket kinagat ti moskito a nakaimet iti dengue virus idi nagbiahe sadiay Cuba.
Nakumpirmar ti dengue infection ti 41-anyos a lalaki idi Setyembre ken nasdaaw dagiti doktor gaputa saan met daytoy a nagbiahe iti pagilian nga addaan ti kaso ti dengue.
Nakitaan met ti partner-na kadagiti sintomas ti dengue infection ken sadiay a naamuan a nagbiahe daytoy sadiay Cuba ken Dominican Republic.
Naduktalan iti analysis iti sperm dagitoy a ti dengue virus ket kapada ti virus dagiti dengue nga adda sadiay Cuba.
Dinakamat pay ni Jimenez nga adda ti panagadal sadiay South Korea seknan iti posibilidad a panakaiyakar ti dengue babaen iti panagnaig ti lalaki ken babai.
Sigun met iti European Centre for Disease Prevention and Control, iti panaka-ammoda ket daytoy ti kaunaan a sexual transmission ti dengue virus kadagiti lallaki a makinanaig iti padada a lallaki.
Sigun pay iti World Health Organization, maiyak-akar ti dengue babaen iti kagat ti lamok nga Aedes Aegypti. -AFP
