Naipatungpal ti umuna nga off road challenge iti Munisipyo ti Sablan kas paset ti aktibidaded ti maika-12 Sablan Fruit Festival a pinasetan ti nagduduma a 4×4 off roaders manipud iti nagduduma a lugar.
Sigun kenni Mayor Alfredo Dacumos, Jr., dagiti nakipaset iti nasao nga aktibidad ken nagtaod pay manipud idiay Bacoor, Pampanga, Kalinga, Ilocos Sur, ken dadduma pay a lugar.
Impeksa ni Mayor Dacumos, Jr. a ti dati nga aktibidad a nang-integrate iti nasao a piesta ket ti carshow.
Nupay kasta, nakikoordinar kadakuada ti dadaulo ti 4×4 off roaders ti Baguio-Benguet kadua ti Barangay Chairman ti Puguis, La Trinidad, Benguet tapno inayun ti nasao nga aktibdiad iti piesta dagitoy.
Immanugot met ni Mayor Dacumos, Jr. ngem impettengna a tumulong laeng dagitoy ket ti nasao a grupo ti mangipaay kadagiti prizes.
Sigun kenni Mayor Dacumos, Jr., adu ti naragsakan gapu iti nasao nga aktibidad, saan laeng a dagiti nakipaset nu di ket uray metlaeng dagiti residente sadiay.
Sigun met kadagiti partisipante, naidumduma ti 4×4 off road challenge iti bantay nu idilig iti lowland areas.
Kabayatanna, posible a maipatungpalto manen daytoy inton umay a tawen.
Ti nasao nga 4×4 Off Road Challenge ket naipatungpal idiay Poblacion, Palali, Sablan, Benguet , iti lote ti maysa a private individual. //via Bombo Noveh Organo
