Naipaigiden dagiti natuled a kayo iti paset ti Barangay Ferdinand, Baguio City itay laeng agsapa.
Iti panakiuman ti Bombo Radyo kenni Police Colonel Ruel Tagel, City Director iti Baguio City Police Office, nagturong dagiti kameng iti City Mobile Force Unit ken ti Police Station 5 iti nasao a barangay itay agsapa para iti clearing operation.
Sigun kenni Tagel, nakaawatda iti report seknan iti natuled a kayo alas tres iti parbangon ita laeng nga aldaw nga intunda iti napigsa nga angin ken panagbayakabak iti tudo.
Nupay kasta, kinunana nga inurayda a kimmalma bassit ti panawen sakbayda a rimmesponde tapno maliklikan ti posible a panakapasamak ti sabali pay nga insidente bayat ti clearing operations dagiti personnel.
Iti sabali a bangir, awan ti makitkitada a parikut maipapan iti gunay ti trapiko iti lugar gapu ta napartak a naikkat dagiti nakaharang iti tengnga iti kalsada.
Manarimaan metten ti panangisimpa dagiti kameng iti Benguet Electric Cooperative(BENECO) ken dagiti telecommunication companies kadagiti kable wenno linya iti kuryente a naapektaran iti panagtuled dagiti kayo iti nadakamat a barangay.//Bombo Jez Lapizar
