BAGUIO CITY- Asidegen a maideklara a maysa a National Heritage Zone ti Kennon Road.
Daytoy ket kalpasan a naaprobaran iti pinal a panakaibasa iti kamara ti singasing para iti daytoy.
Sigun iti awtor ti ordinansa a ni Baguio City Congressman Mark Go, kiniddawna ti dagus a panagtataripnong dagiti maseknan nga ahensia kas iti Department of Tourism (DOT), Department of Public works and Highways (DPWH) ken iti lokal a gobierno ti Baguio City ken Tuba, Benguet para iti panangisagana dagitoy kadagiti kasapulan a dokumento iti maipatungpal a restoration, rehabilitation ken development iti Kennon Road.
Kinunana a sagudayen ti nasao a singasing a linteg ti panakailatang ti pondo iti DPWH ken DOT para iti nasao a panggep.
Kinunana a nasken laeng a masustinir ti pakabigbigan ti Kennon Road a maysa kadagiti kangrunaan a kalsada nga agturong iti siudad ti Baguio ken probinsia ti Benguet.
Naamuan a naaramid ti nasao a kalsada idi pay tawen 1903.
