BAGUIO CITY–NAIPARIKEP ti Kennon Road kadagiti motorista idi kalman agingga ita nga aldaw.
Daytoy ket gapu pay laeng agtultuloy a landslide ken rockslide a mapaspasaran iti nasao a kalsada.
Maibasar iti pakdaar ti DPWH- Cordillera, ti panakaiparikep ti Kennon Road ket kas maibasar iti rekomendasyon ti Cordillera Regional Disaster Risk Reduction and Management Council.
Daytoy ket tapnu maipanamnama ti kinatalged dagiti motorista a dumalyasat sadiay.
Agtaltalinaed met a suspendido dagiti amin a tourism activities kadagiti bantay nga ada iti masakupan ti probinsya ti Benguet.
Daytoy ket gapu pay laeng iti mapaspasaran a panagtudo nga ituntunda ti habagat ken ti tropical depression nga Ester.
Iti situational report ti Office of the Civil Defense- Cordillera, impakaammo dagitoy a suspendido latta ti trekking ken hiking activities iti Mt. Pulag sadiay Kabayan ken ti Mt. Purgatory sadiay Bokod.
Malaksid iti daytoy, suspendido metlaeng ti hiking iti Mt. Ulap sadiay Itogon ken ti spelunking activities iti Aran Cave sadiay Tuba, Benguet.
Kabayatanna, suspendido metlaeng dagiti mining activities sadiay Itogon, Benguet.
