Niluktan manen iti Department of Public Works and Highways (DPWH) ti Kennon Road para laeng iti light vehicles kalpasan ti sumagmamano a lawas a panangiserra gapu iti agtultuloy a napigsa a panagtudtudona.
Impablaak ni DPWH Secretary Vince Dizon ti panaglukat iti dalan kalpasan ti inspection na kadagiti nadadael nga imprastraktura iti Baguio City ken Benguet.
Sigun iti DPWH-CAR, nadalusan dagiti debris manipod iti sumagmamano a panagregaay iti daga ken rockfall, ngem 5-ton load limit laeng ti mapatgan iti Kennon Road.
Mabalballaagan dagiti heavy vehicle nga aramaten ti Marcos Highway wenno Asin–Nangalisan–San Pascual–La Union Boundary Road.
Agtalinaed met a nakaserra ti Acrow Bridge idiay Sitio Camp 2, Barangay Twin Peaks, Tuba, Benguet, isut gapuna a kasapulan nga aramaten dagiti motorista ti one-lane detour road.
Nagballaag ti DPWH-CAR a mabalin a temporario a maiserra ti Kennon Road kadagiti non-resident nu agtultuloy ti napigsa a panagtudona.
Maguygoyugoy dagiti motorista nga agannad, bantayan ti kasasaad iti panawen ken kalsada, ken suruten dagiti abiso iti otoridad.
