BAGUIO CITY – Opisyalen a nangrugi ti panagbakuna kontra iti COVID-19 kadagiti ubbing nga agtawen ti lima agingga sangapulo ket maysa iti Baguio City babaen iti naisayangkat a kiddie party-themed ceremonial vaccination idi kalman.
Naidumduma ti kid-friendly set-up dagiti dua a vaccination sites partikular ti Saint Louis University ken SM Baguio.
Sumabat ti nagduduma a maris ti balloons, imahe dagiti disney princess ken cartoon characters kadagiti nasao a pagpabakunaan.
Mangnamnama ti lokal a gobyerno ti Baguio ken ti City Health Office a babaen iti daytoy ket maragsakan ken maguyugoy dagiti ubbing nga agpabakuna.
Iti panagwanawan ti Bombo Radyo News Team, ado nga ubbing kadwada dagiti nagannakda ti nagturong kadagiti nadakamat a vaccination sites kagiddan ti panagrugi ti panagbakuna kadagitoy.
Sigun kenni Dra. Malou Pakoy, puntirya ti City Health Services Office a mabakunaan ti 26,000 nga ubbing iti siudad.
Iti naangay a ceremonial vaccination, 16 nga ubbing dagiti health workers, opisyales ken empleyado ti gobyerno a nakasuot iti namamaris a bado ti naipaayan ti umuna a dose ti COVID vaccine.
Dumanon met iti 272 nga ubbing iti nasao nga age category ti nabakunaan.
Maawat dagitoy ti maikadua a dose ti bakuna kalpasan ti 21 nga aldaw.
Kabayatanna, impeksa dagiti guardians a nakauman ti Bombo Radyo ti panangsuportarda iti panakabakuna dagiti ubbing tapno makasubli metten dagitoy iti face-to-face a wagas ti panagadal.
Kagiddan iti daytoy, guygugoyen ni Dra. Pakoy ti panangipabakuna dagiti nagannak kadagiti annakda tapno masalwadan dagitoy manipud iti COVID-19.
Dinakamatna nga agimet laeng ti ID wenno birth certificate dagiti guardians wenno nagannak a mangkuyog kadagiti ubbing nga agpabakuna kontra iti COVID-19.
