BAGUIO CITY – Saan pay a patgan ti lokal a gobyerno ti Baguio City ti kiddaw ti maysa a korporasyon ti jeepney nga addaan ti paradaan sadiay Bokawkan Road a mapalubusan koma ti panangidiskargada kadagiti pasaheroda iti maysa nga establishimento iti baba ti City Hall manipod iti alas-singko ti agasapa agingga iti alas-nuebe ti rabii tapno saan unay a marigatan dagiti pasahero.
Sigun kenni PLtCol. Oliver Panabang, dadaulo ti Traffic Enforcement Unit ti Baguio City Police Office (BCPO), mangitunda daytoy iti nailet a gunay ti trapiko iti nasao a disso nangruna ta adda ti maar-aramid a widening project iti paset ti Naguillian Road.
Nupay kasta, kinunana a mapalubusan laeng nga agidiskarga dagiti jeep iti nasao a disso iti agingga alas-otso ti agsapa.
Kinunana a saan nga agdanag dagiti jeep gaputa iti kanito a malepas dagiti road widening projects a maar-aramid iti Naguillian Road ket mapalubusan manen dagitoy nga agidiskarga kadagiti pasahero iti baba ti City Hall.
Imbinglayna nga adda pay ti maaramid a patrabaho iti paset ti Camp Allen a rason a saanda pay a patgan ti kiddaw ti nasao a koorporasyon.
Kagiddan iti daytoy, kiniddawna kadagiti pasahero ken kadagiti drivers ti panagi-innanos ken ti panangawatda iti agdama a sitwasyon nangruna ta manarimaan dagiti patrabaho iti siudad.
