BAGUIO CITY – Impetteng ni Mayor Mauricio Domogan a saanen a patgan ti lokal a gobyerno ti kiddaw a panakailaylayon ti operasyon ti kontrobersial a carnival rides iti children’s playground sadiay Burnham Park.
Kinunana a saanna a kankanunungan ti kiddaw panakailaylayon ti operasyon ti nasao nga amusement rides gaputa posible a maapektaran ti konsentrasyon dagiti ubbing ken estudyante iti kanito nga agrugi ti klase inton sumaruno a lawas.
Kinuna ti mayor nga adda latta ti bileg ti konseho a mangaprobar iti nasao a kiddaw ngem nasken met a maikonsidera ti immunan a katulagan a para laeng iti summer vacation ti operasyon ti nasao a carnival rides.
Immuna iti daytoy, kinuna dagiti sumagmamano a konsehal a posible a mapatgan ti kiddaw nga extention ti carnival tapnu makasubbot ti organizer iti dakkel a pukaw daytoy gapu iti kanayonna a panagtudtudona iti malem.
