BAGUIO CITY – Naaprobaranen ti kiddaw a pondo dagiti sumagmamano a departamento a saksakupen ti lokal a gobyerno ti siudad ti Baguio para inton 2018.
Iti maikadua a budget hearing ti lokal a konseho, naaprobaran ti kiddaw a P95-M para iti Sangguniang Panlungsod, ti P40-M para iti Baguio City Police Office, ti P40.9-M para iti City Environment and Parks Management Office, ti P33-M para iti City Veterinary Office ken ti P25-M para iti City Human Resource Management Office.
Naaprobaran pay ti kiddaw a pondo a P4.8-M para iti City Prosecutor’s Office, ti P1.7-M para iti Baguio City Jail – Female Dormitory, ti P5.2-M para iti Baguio City Jail – Male Dormitory , ti dumanon P600,000 para iti Public Attorney’s Office ken ti P250,000 para iti Parole and Probation Administration.
Saan met a naaprobaran ti kiddaw a pondo ti dadduma nga opisina iti lokal a gobyerno ti siudad ti Baguio.
Sigun kadagiti konsehal, nainget a suksukimatenda dagiti kiddaw a pondo ken tarigagayda nga agparang iti konseho dagiti dadaulo ti tunggal departamento tapnu ilawlawag dagitoy no anya dagiti pagkasapulanda para iti sumaruno a tawen.
Naituding met a maipasidong iti sumaruno a budget hearing iti City Council ti kiddaw a pondo ti City General Services Office a dumanon iti P308-M ken ti City Treasury Office a dumanon iti P76-M.
