BAGUIO CITY – Inlawlawag ti ama ti Itogon, Benguet ti killaat a panagngato ti kaso iti COVID-19 iti masakupan ti munisipyo.
Iti panakiyuman ti Bombo Radyo Baguio, kinuna ni Mayor Victorio Palangdan a ti panagngato ti kaso ti COVID-19 sadiay ket gapu iti maisaysayangkat a mass testing ken contact tracing kadagiti indibidual a nakapulapol ti maysa a pasyente a nagpositibo iti COVID-19.
Kinunana a maysa pay a rason ti mandatory swab testing kadagiti amin nga indibidual nga agturong kadagiti ospital tapnu agpacheck-up.
Dinakamatna a kaaduan kadagiti naduktalanda a positibo iti sakit kalpasan ti contact tracing ket agkakapamilya ken agkaka-aruba.
Imbinglay ni Mayor Palangdan a kaaduan kadagiti pasyente ti COVID-19 sadiay Itogon ket awanan ti sintomas isut gapuna a naka-isolate laeng dagitoy kadagiti bunkhouses ken naiturong kadagiti isolation units ti lokal a gobierno.
Kabayatana, naipanamnama met ti panakaipaay ti taraon ken suporta kadagiti indibidual a maipasidong iti lockdown ken quarantine sadiay Itogon.
Iti agdama ket dumanonen iti 198 ti pakabuklan a kaso ti COVID-19 sadiay Itogon, Benguet a bukbuklen ti 151 nga aktibo a kaso, 44 a naimbagan ken tallo nga ipupusay.
