BAGUIO CITY – Agladladingit ita dagiti jeepney drivers ken operators gaputa awan pailaeng ti aksion ti LTFRB iti kiddawda a kanayonan a plete.
Iti panakiuman ti Bombo Radyo Baguio, kinuna ni Pat. Evangelista, presidente ti Jeepney Operators and Drivers Association iti Cordillera ken Region 1, agingga ita ket saan pailaeng a pinatgan ti nasao nga ahensia ti kiddawda a maipangato iti P15 ti minimum a plete.
Iti baet ti dayta, pagyamyamanan ti federasion ti P6,500 a fuel subsidy para kadagiti drivers ken operators ngem sigun kadakuada ket saan latta nga umdas daytoy.
Impettengna a nasken nga ikonsidera ti LTFRB iti komputasionda ti agtultuloy a panagngato ti presio ti petrolyo ken ti presio dagiti motorcyle parts.
Innayonna a nupay adda ti napasaran a rollback iti naglabas a dua a lawas ket saanda latta a marikna daytoy gaputa maysa agingga dua pesos laeng ti naikessay iti presio ti tunggal litro ti petrolyo.
Gapu iti daytoy, impaganetgetna a saan nga umdas a rason wenno pagbasaran ti fuel subsidy nga ipaay ti ahensia tapno saandan a patgan ti arungaing dagitoy.
