Impeksa ni Angelica Ramos, Punong Barangay ti Camp 7 a kidkiddawenda ita ti pannakaaramat ti pasdek a binackfillan ti Department of Public Works and Highways asideg iti Lion’s Head kas pagparadaan ken pangiyakaran kadagiti stalls bayat a maururay ti panggep a baro nga stalls para kadagiti vendors sadiay.
Iti pannakiuman ti Bombo Radyo, impakaaamo ni Ramos a napagsasaritaanda idi kalman a posible a marugian ti pannakaiyaramid dagiti baro nga stalls inton Nobyembre 3
Innayonna a mapatta-patta a 27 stalls nga addaan iti agpapada a maris ken desinyo ti maaramid kas iti naimuntar idiay Burnham Park ti maaramid para kadagiti aglaklako sadiay, kas maibasar iti inaramid iti City Engineering Office (CEO) a plano.
Nupay kasta, impeksana a maysa daytoy a karit kadagiti vendors gapu ta mapatta-patta a dumanon iti P100,000 ti magastos iti tunggal stall a maipatakder.
Impeksana metlaeng a mannarimaan ti panangkontakda iti kontraktor ken manamnama a marugian ti nasao a proyekto inton Nobyembre 3.
Inlawlawagna met a nagpinnirman ti DPWH ken siudad ti Baguio iti Memorandum of Agreement (MOA) para iti pannakaimuntar dagiti stalls no sadino ti sidung ti nasao a MOA, dagiti vendors ti mangbaklay iti gastos i pannakaiyaramid dagiti stalls. Nakalanad metten sadiay dagiti guidelines iti panagpatalinaed iti kinadalus ken dadduma pay.
Kabayatanna, impakaaamona nga awan ti masingir a parking fee iti nasao a pasdek ken voluntary.
Maururay metten ti sumaruno pay nga addang manipud kadagiti maseknan nga ahensya ti siudad seknan iti nasao nga issue. //kcs//
