BAGUIO CITY – Pimmusay ti maysa a maladaga nga agtawen iti maysa kalpasan nga aksidente a napandagan ti amana a nabartek bayat a matmaturog dagitoy iti pagtaenganda iti siudad ti Baguio.
Maibasar iti medical certificate of death a sinukimat iti City Health Services Office (CHSO), rason ti ipupusay iti maladaga ti mechanical asphyxia gapu iti nakaro a pannakapandagna iti barukong kalpasan a pinandagan iti amana.
Sigun kenni City Health Officer Dr. Celia Flor Brillantes, maipakpakita iti insidente ti pangta iti nakaro a panaginum iti arak, nangruna kadagiti maladaga ken ubbing a saanda a kabaelan nga idepensa ti bukodda a bagi.
Inlawlawag iti CHSO a makaapektar ti arak iti panunot, huwisyo, ken panaggaraw iti maysa a tao, rason tapno saan a dagos a madlaw dagiti pangta iti aglawlaw. Mabalin metlaeng a mangitunda daytoy iti panagturog a nasayaat isut gapuna a saan a madlaw ti maysa a tao a nabartek ti ubing a naipit wenno agkasapulan iti tulong
Karaman metlaeng kadagiti pangta iti panagbartek ti aksidente iti kalsada, kinaranggas iti pagtaengan ken panangbaybay-an dagiti ubbing.
Gapu iti daytoy, pinalagipan iti CHSO ti publiko nga uminom iti responsable wenno mangliklik laeng iti arak. Impaganetgetna metlaeng a saan a rumbeng nga agaywan kadagiti ubbing ti siasinoman a nakainom ken rumbeng a maitalek dagitoy iti saan a nakainom a nataengan.
Ginuyugoy metlaeng iti opisina ti City Council a maipasa ti singasing a Liquor Code o Alcohol Harms Prevention Ordinance nga agdama nga adda iti maikadua a pannakaibasana.
Kabayatanna, mabalin met nga agturong iti kaastigan a District Health Center dagiti umili a kayatna nga agkiddaw iti tulong tapno maisardeng ti panaginum iti arak.





