BAGUIO CITY – Impetteng ni PNP chief Dir. Gen. Oscar Albayalde nga awan ti lugar ti hazing wenno panagmalmaltrato kadagiti kadete iti uneg ti aniaman a training institutions wenno akademya.
Kinunana a ti hazing ket maysa a banag iti napalabas a panawen a rumbeng a saan a maipasa pay kadagiti sumarsaruno a henerasyon.
Nagbalin a komentona daytoy kalpasan a nakapatang ti media seknan iti reaksiyonna iti panagmaltrato iti daydi 4th Class Cadet Darwin Dormitorio a nagresulta iti ipupusay daytoy.
Nupay kasta, inaklonna a daytoy a mismo ket nakapasar iti panagmaltrato idi kadete paylaeng ti Philippine Military Academy.
Kinunana a minaltrato daytoy dagiti nagbalin nga upperclassmen-na ngem saan a simmakit ti nakemna kadagitoy.
Kagiddan iti daytoy, impettengna manen nga awan ti lugar ti hazing gaputa ita ket modernon ti panawen.
Inyunay-unay ni Albayalde nga adu ti wagas tapnu madusa dagiti kadete nga addaan panaglabsing kas iti panangipila ti administrative case, pangipataw ti demerits ken panagpa-ehersisyo.
Innayonna a nasken a sumardengen ti maltreatment nga agresresulta iti senseless death gaputa masaysayang ti masakbayan dagiti biktima a kadete.
