BAGUIO CITY – Awan ti nalabsing nga election laws iti kontrobersial a panakaisayangkat ti Run Sara Run Movement sadiay La Trinidad, Benguet a dinar-ayan dagiti tallo nga opisyal ti probinsia.
Sigun kenni COMELEC-Benguet Provincial Election Supervisor Atty. Elenita Julia Tabangin-Capuyan, awan ti nalabsing iti Omnibus Election Code iti nasao nga aktibidad gaputa saan paylaeng a nangrugi ti panawen ti panagkampanya ken panagpila iti certificate of candidacy para iti eleksion inton sumaruno a tawen.
Kinunana saan metlaeng a maibilang ti aktibidad a premature campaigning gaputa awan ti opisyal a waragawag ni Davao City Mayor Sara Duterte no agtaray daytoy iti kina-presidente inton sumaruno a tawen.
Inyunay-unayna met a saan a madiskwalipikar ti nasao a politiko gaputa awan ti linabsing daytoy a pagaladagan ti Omnibus Election Code.
Inlawlawag pay ni Atty. Capuyan a saan met a mabalin a makasuan dagiti maseknan nga opisyales ti Benguet gapu ta nalawag iti Poll Automation Law a saan nga iligal ti insayangkat dagitoy nga aktibidad.
Maipalagip a nakaawat iti pammabalaw dagiti opisyales ti Benguet a nakita a nakipaset iti nasao nga aktibidad ngem inkalinteganda a saan a panagkampanya ti napasamak ngem ketdi, imparang laeng ti kongresista ti probinsia dagiti programa daytoy para iti panagdur-as ti Benguet.
