Kukuestionaran ti sumagmamano a residente ti kinabayag a pannakaileppas ti manarimaan a konstrucsion ti kalsada iti masakupan ti Brgy Hillside, Baguio City.
Sigun iti nakauman ti Bombo Radyo a saanen a nagpabigbig, idi napalabas paylaeng a tawen a narugyan ti nasao a proyekto ngem saan paylaeng a nalpas agingga ita.
Malaksid iti dayta, masdaaw dagitoy nu apay a rumrumwar iti portal iti siudad ti Baguio a “completed” ti status daytoy.
Nupay kasta, inlawlawag ti City Engineering Office, Planning Division/Section babaen kenni Engr. I Rodel Lagare a tallo a projects ti nagsasabay a naaramid sadiay.
Innayunna nga uppat ti proyekto sadiay ngem immunan a nalpas ti maysa a project idi napalabas a tawen.
Dagiti nabatbati ket dagiti tallo a proyekto, pakairamanan ti: 1) Rehabilitation/improvement of Hillside Road, contractor DLK construction, more than 13 million, around 220 meters; 2) Completion of Road Recovery from Military Cut-off road to loakan road vis Sta. Scholastics, contractor A.P Na-oy construction supply and Aggregates, more than 16 million around 223 meters; ken 3) Rehabilitation/Improvement of Sta. Escolastica Road to Scout Barrio, contractor capable builders around 190 meters.
Inlawlawag ni Engr. Lagare a dua kadagiti proyekto ket nalpasen idi Pebrero 2026.
Ti nabatbati nga ongoing ti konstruksyonna ket iti Completion of Road Recovery from Military Cut-off road to loakan road vis Sta. Scholastics, contractor A.P Na-oy construction supply and Aggregates.
Kinuna ni Engr. Lagare a nabayagen ti nasao a proyekto gapu ta naadaan iti adjustments on site ken gapu kadagiti bagyo a naglablabas.
Gapu ti dayta, nailaylayun ti panakaleppas ti proyekto agingga iti May 25, 2025.
Nupay kasta, naadaan manen dagitoy ti parikut iti pipe line ken iti telco posts rason tapnu makikoordinar pay dagitoy kadagiti maseknan nga ahensya tapnu masulbar ti nasao nga issue.
Gapu iti dayta, nailalayon manen completion date aginga iti June 24, 2026.
Impetteng ni Engr. Lagare a binilinda ti kontraktor a partakanda ti panakaleppas ti proyekto nangruna ta panagbabagyo.
Iti agdama 73% ti nalpas iti nasao a proyekto no sadinno drainage ken pavement laengen ti kasapulan a maisimpa.
Kabayatanna, inlawlawag ti opisial a tallo ti kontraktor ti nasao a proyekto.//Bombo Noveh Organo
