Ti kinakurang ti pondo para iti pannakaipatungpal ti research ken produksiyon dagiti technologies a partuat dagiti faculty members sadiay Ifugao State University ti kangrunaan a problema a napasaran dagitoy iti pannakaaramid dagiti produkto a naiparang sadiay Newtown Plaza Hotel iti siyudad ti Baguio.
Iti panakiuman ti Bombo Radyo kenni Moses Appoy, University Director Intellectual Property Technology Business Management Center ti Ifugao State University, kinunana a limitado ti pondo nga ipapaay ti unibersidad dagitoy para iti panag-adal nga ipatpatungpalda.
Gapu iti dayta, mangal-alada iti pondo manipud iti Department of Science and Technology (DOST).
Nopay kasta, saan met a nagbalin a lapped kadakuada ti nasao a parikut gapu ta nakapartuat latta dagiti faculty members kadagiti nagduduma a produkto kas iti nuggets, embutido, ken longganisa manipud iti swamp eel kasta met kadagiti kalamatis soap, holoc de hapon, ken dadduma pay.
Naibinglay ni Appoy a dumanon iti maysa a tawen wenno nasursurok pay ti maipatpatungpal a panagadal sakbay a mapartuat dagiti nasao a produkto gapu ta kasapulan a dumalan daytoy iti naan-anay a panag-adal.
Gapu iti dayta a kinabayag ti panawen a busbusen dagitoy para iti pannakaipatungpal ti panag-adal ken ti kinaado dagiti analysis a maipatungpal iti tunggal produkto ket kasapulanda kuma ti naan-anay a pondo para kadagitoy.
Iti sabali a bangir, naibinglay met ni Dr. Nancy Bantog, Regional Director iti DOST CAR kabayatan ti naipatungpal a kapihan iti siudad ti Baguio, sisasagana met ti opisina dagitoy a mangipaay iti suporta partikular ti panangipaay iti pondo para kadagiti researchers tapno balligi ti pannakaipatungpal dagiti panag-adalda ken ti pannakapartuat dagiti technology wenno produkto dagitoy.
