BAGUIO CITY – Pinaglibakan ti asosasyon dagiti drug store owners sadiay Tabuk City, Kalinga ti rason ni Tabuk City Mayor Darwin Estrañero nga agkurkurang ti suplay dagiti scanners sadiay isut gapuna a gimmatang ti lokal a gobyerno kadagiti nangingina nga scanners iti ruwar ti Tabuk City.
Nailanad iti joint affidavit nga inruwar ti nasao nga assosasyon a saan a pudno a saan a kabaelan dagiti drugstores sadiay a mangsuplay iti 100 a pidaso ti thermal scanners gaputa umdas met ti suplay dagitoy.
Inlanadda a tarigagayda a suplayan ti pagkasapulan ti Tabuk City LGU iti medical equipments isut gapuna a nagboluntaryoda a mangsuplay iti thermal scanners ken dadduma a medical devices nga aramaten kuma ti siyudad ngem awan ti naawat dagitoy a sungbat.
Nailanad pay iti affidavit a saan a pudno nga adda ti naisayangkat nga inquiries ken canvassing kadakuada sakbay a nagdesisyon ti lokal a gobierno iti Tabuk City a gumatang kadagiti dadduma a suplayer iti ruwar ti siyudad.
Nailawlawag pay iti nasao nga affidavit a dagiti botika sadiay ket nainget nga iwanwanawan ti Food and Drug Administration ken ti Department of Trade and Industry isut gapuna nga awan ti rasonda a mangipangato iti presyo dagiti medical equipments a lako dagitoy.
Maipalagip a nababalaw iti lokal a gobierno ti Tabuk kalpasan a naipablaak iti publiko ti nangina a presyo ti thermal scanners ken medical supplies a ginatang dagitoy iti ruwar ti siyudad. (with report from Bombo Brigitte Marcasi)
